HNLC-in 'one nation, one election' dodal

Meghalaya-a Hynniewtrep National Liberation Council (HNLC) chuan Bharatiya Janata Party (BJP)-in ‘one nation, one election’ kalpui an tum chu dodalin, Hindutva inzirtirna tihlarna hmanrua mai a ni, an ti. Hindutva inzirtirnaah hian India ram pumpui chu Hindu sakhaw hnuaia dah tum a ni.

"Hetiang kalphung hi inzirtirna chi khat chawisanna niin, sakhaw zalenna a kalh a ni. India ram democracy a tih derthawng bakah, minority-te chanvo pawh a tiderthawng a ni'" tiin HNLC general secretary-cum-publicity secretary Sainkupar Nongtraw chuan a sawi.

Nongtraw chuan BJP chuan Hindutva inzirtirna tilarin Hindu Rashtra din a tum a, India hi democracy aṭangin theocracy-a leh a tum a ni tia sawiin, political party, pressure group leh mimal hrang hrangte pawhin India politics kalphung leh democratic principles chu a nghawng thei dawn tiin an hlauhthawnna an sawi chhuak a ni, a ti.

BJP hmalakna chuan India-a hnam leh sakhaw hrang hrang awmte inpumkhatna leh democracy kalphung a ti derthawng dawn tih sawiin Nongtraw chuan, uniform election system kalpui an tum 'one nation, one elction' chu India politics kalphung tan a pawi avangin mi tam takin an ngaihven tih a sawi.