India-in Manipur chungchanga UN expert thusawi pawm lo
India Mission chuan United Nations (UN) expert-te'n Manipur boruak an hmuh dan an sawi chu an pawm loh thu an sawi. Manipur state chu a ralmuang tia sawiin, UN expert-te chu mipui rilru hruaikawi tumah an puh a,an inrawlh lohna turah an inrawlh a ni, an ti bawk.
Office of the High Commissioner for Human Rights, Indian Mission Special Procedures Branch chuan Thawhṭanni khan thuchhuah siamin, Manipur boruak chu a ralmuangin nunphung a pangngai tawh a, India sorkar chuan remna leh nunphung pangngai a awm reng theih nan theihtawp chhuah a inhuam tih a sawi.
"Sorkar chu India ram mipuite dikna chanvo humhim turin in peih a, hei hian Manipur mipuite pawh a huam tel vek a ni," tiin an thuchhuahah an tarlang.
"U.N expert-te chu an inrawlh lohna turah inrawlhin an thusawi chuan mipui rilru a dik lo zawngin a hruai kawi theih bakah, Manipur boruak leh a chingfel tura India sorkar hmalakna an hriat chian loh avangin an thusawi chu Permanent Mission of India chuan a pawm lo a ni," tiin Geneva-a Permanent Mission of India to the United Nations Office chuan thuchhuah a siam.
U.N expert-te'n Manipur-ah human rights palzutna nasa tak thlengin, hleilenna, inthahna, in leh lo tihchhiat, inhnawhchhuahna, insawisakna leh intihnawmnahna a thleng tia an sawi hnua thuchhuah hi siam a ni.
Special Procedure Mandate Holders (SPMH)-in ‘India: U.N. experts alarmed by continuing abuses in Manipur’ tih thupuia hmangin news release an siam chu an pawm loh thu sawiin Permanent Mission of India chuan, August 29,2023-a hemi topic tho hmanga thuchhuah siam tawh chhan letna hun ni 60 chhung India sorkar-in a neih pawh nghak hman loa SPMH-in thuchhuah dang an siam leh chu a lungawithlak loh hle tiin an sawi.
India mission chuan hun lo la awm leh zel turah chuan, assessment an neihin SPMH chu thlei bik neilo leh, thudik chauh chhuah tawh turin an ngen a ni.
U.N expert-te hian an thuchhuah siamah hian, Manipur-a Kuki hnam hmeichhiate leh hmeichhe naupang kum tling lote laka hleilenna nasa lutuk thleng chu rapthlak an tih thu an sawi a, "Pawikhawihna thlenga sawi zingah hian pawngsual rawn, saruaka khawlai fanpui, vuak hlum leh nung chunga halte a tel a ni," tiin an tarlang. Manipur-a mihring dikna chanvo palzutna nasa tak thleng tireh tur hian hmalakna a ṭha tawk lo, an ti bawk.