Manipur sorkar-in a vawi khatna atan Think Tank a rawn

Manipur State Population Commission (MSPC) chuan Thawh­ṭanni khan Hotel Imphal-ah Tink Tank (expert panel) chu consultative meeting a neihpui.

Meeting-ah hian Manipur Advocate General Lenin Singh Hijam, chief guest ni bawk chuan India sorkarin Merger period hunlaia Manipur ram chin leh mipui zat record-na '150 White Paper on Manipur’s size and population' chu a sawi lang a ni. Kum 70 chuang information dik lo thehdarh a ni chu a pawi bakah, state leh national security-ah nghawng a nei thei tih a sawi. Expert panel-te chu thuthlukna an siam hmain hemi chungchang hi ngaihtuah turin a ngen bawk.

Meeting-naa tel ve Commissioner (Home) functional president T. Ranjit Singh chuan Manipur State Population Commission chu February 17, 2023-ah din a nih thu sawiin, state chhunga dan loa lo lutte dang turin sorkar chuan Minister pathum awmna Cabinet sub-committee chu 16 February, 2023-ah a din a ni. Myanmar ramri hrula awm district pangaah dan loa lutte zawn chhuah hna thawh niin, hun rei lote chhungin dan loa lut mi 2000 chuang hmuh chhuah an ni a, sorkar chuan heng mite tan hian awmna a siamsak a ni.

State chhunga mipui awm zat chungchangah kum 130 chhungin group ṭhenkhat population chu a pung thut tih Singh chuan a sawi. Kum 1881 census-a a lan danin Meitei population chu 1,30,000 bawr vel niin, kum 2011 census-ah chuan 12,20,000 in an pung a, Naga population chu 1881 census-a 60,000 chu 2011 census-ah 6,04,000 in an pung a ni. Kuki-Mizo population chu 1881 census-ah 17,000 chauh a nih laiin, kum 2011-ah erawh 4,48,000-in an pung hman thung tiin a sawi.

Manipur State Population Commission buatsaih Panel of Experts Meeting chuan uluk taka an ngaihtuah hnuah, sorkar hnena proposal dik leh rintlak an theh lut ngei a beisei thu a sawi bawk.