Manipur : Editors' Guild-in an member-te laka FIR theh luh an dem

Editors’ Guild of India (EGI) executive committee chuan Manipur sorkarin an member pali te laka FIR a theh lut chu an dem tih an sawi a, Supreme Court-ah zualkoin FIR suttir turin an ngen.

Manipur tualchhung buaina media-in an report dan a hmuna zir chiang tura fact-finding team member pali-te lakah Manipur sorkar chuan FIR hi a theh lut a ni.

"Fact-finding team-te report ṭha taka lo dawnsawn a hnekin, state sorkarin an laka FIR a theh lut ta zawk hi The Guild chuan ngaimawhawm a ti hle," tiin EGI executive committee chuan an thuchhuahah an tarlang.

EGI chuan, "Report chhan letna tura Manipur chief minister N Biren Singh-a'n ṭawngkam dengkhawng tak hmanga thuchhuah a siam chu mak kan ti hle," tiin an sawi zui bawk.

Fact-finding team hian an report-ah, "State thuneitute chuan tualchhung buainaah hian ṭan lam an nei tih a chiang. Hnam leh hnam intihbuainaah hian sorkar chuan ṭan lam a nei tur a ni lo a, democratic government an nih anga state pum ai an awh tur a nih laiin, an tih tur an hlen lo a ni," tiin an sawi.

"Roreltute leh an hmanrua (police leh security force dangte) leh bureaucracy-te chu hnam thil avangin an inṭhen darh a ni. Imphal-ah Meitei sorkar, Meitei police leh Meitei bureaucracy an awm a, hill area-a cheng tribal-te hian hei hi an ring ngam lo a ni," tiin an tarlang.

Manipur police-te hian EGI president Seema Mustafa leh member dang pathum– Seema Guha, Bharat Bhushan leh Sanjay Kapoor lakah FIR an ziak lut a ni.

CM Biren Singh chuan EGI chu ṭan lam nei, Manipur state-a buaina dang tihpunlun tum zawnga thiltiah puhin, an lakah FIR chu theh luh a ni, tiin a sawi.