KSU-in MBBS state quota dilna lut ennawn phut

Meghalaya-a Khasi Students Union (KSU) chuan state sorkar chu MBBS state quota dilna theh lutte document chu ennawn turin state sorkar an phut a, state health minister Ampareen Lyngdoh an hmu bawk.

KSU president Lambokstar Marngar leh general secretary Donald Thabah-te kaihhruaiin zirlai pawl aiawhte hian Minister Lyngdoh hi an hmu a, an thil phut chungchang hi an sawipui a ni.

Donald Thabah chuan, document theh luh danah thil dik tawk lo awm a awm a ni tiin, criteria-ah hian state quota diltu chu an state-a cheng nghet ngei, Permanent Resident Certificate nei ngei an ni tur tih a nih laiin, dilna theh lut zingah zirlai 10-te chuan Provisional Permanent Resident Certificate (PPRC) an theh lut a ni, a ti. Provisional certificate hi thla 3-12 vel chauh dam a ni a, hemi hnuah chuan he certificate neitu chu India khua leh tui a ni zui tawh lo a ni, tiin a sawi. Hei vang hian hemi chungchang hi chhui chiang turin state sorkar chuan an ngen a, document dik tak neitute zawk dinhmun an luah thei a ni tiin zirlai pawl chuan an tarlang.

Minister pawhin zirlai pawlte thil sawi chu ngaihven zui a, document theh luhte chu ennawn a nih tur thu a lo hrilh. Dik lo a awm a nih chuan sorkar chuan a en liam mai mai dawn lo a, an admission pawh tihtawp leh vek a ni ang, a ti.