Thla 4 hnuah Manipur college-te hawng
Manipur-a tualchhung buaina chhuak avanga Manipur college-te thla 4 lai khar an nih hnuah, nimin September 6 aṭang khan hawn an ni leh tawh tih Manipur chief minister N Biren Singh chuan a sawi.
Chief Minister chuan college-te chu September 6 aṭanga hawn ṭan leh tawh tur thu chu September 5, Teacher's Day tlai khan sawiin, zirna leh mipui himna ngai pawimawh tlang turin a ngen a ni.Class 1-12 school attendence pawh 90% a nih leh tawh thu a sawi bawk.
CM chuan, "State sorkar chuan tun hnaia hun harsa tak a tawn karah pawh zirna chu a ngai pawimawh reng a ni," tiin a sawi.
Governor A Uikey nena an meeting-naah Manipur chief secretary Dr Joshi chuan zirlai, buaina chhuak avanga in leh lo tlanchhiatsante zingah private school fee pe thei lo te chu state sorkar chuan an fee a tumsak dawn tih a sawi.
Manipur governor chuan Chief Secretary chu relief camp-te'n nitin mamawh an tlakchham lohna turin uluk taka vil reng tur monitoring committee din turin a hrilh a, relief camp-a awmte harsatna sutkianna tur helpline siam turin a ti bawk.