Assam police station zawng zawngah CCTV dah vek

Closed-circuit television (CCTV) camera chu Assam state chhunga police station zawng zawngah dah vek a ni tawh tih Assam sorkar chuan Guahati High Court a hriattir.

CCTV zawng zawng chu hman vek a ni, a ti bawk.

Assam Advocate General Devajit Saikia chuan hemi chungchangah hian August 14 khan state sorkar chuan affidavit a theh lut tawh tih a sawi. Affidavit-ah chuan Assam-a police station zawng zawngah sorkar chuan CCTV a vuah vek tawh tih tarlan a ni. Police station-te'n CCTV record chu thla khat zel an vawn ṭhat tur thu leh, central server chuan kum khat chhunga record a vawn ṭhat tur thu a tarlang bawk.

Police-in an mi mante fingerprint/biometric record dah ṭhat chungchang chu central project - National Automated Fingerprint Identification System (NAFIS) hmangin a kalpui dawn tiin Court chu hriattir. Kum 2019-a Union Ministry of Home Affairs-in ti tura a tih angin, State Finger Print Bureau (SFPB) CID Assam chu hemi project atan hian state nodal agency a ni.

Tun dinhmunah hian Guwahati-ah NAFIS workstation 51 a awm mek a, district dangah workstation 34 a awm thung. Police man mi 50,017-te fingerprint chu central server-ah digital-in dah ṭhat a ni tawh.

Kumin kum tir lamah khan Assam sorkar chuan state chhunga police station 332-ah CCTV camera dah vek a nih tur thu hi a lo sawi tawh a ni. Hemi bawhzui hian, state sorkar chuan June 16 khan a thawh khatna leh thawh hnihna atan police station 100-ah CCTV dah a nih tawh thu leh police staion 197-ah CCTV vuah tura hmalak mek a nih thu Court a lo hriattir tawh a ni.