Manipur: COCOMI kawngzawhah mi 25-in hliam an tuar

Manipur-a Bishnupur district-a COCOMI-in kawng zawh an huaihawtah, security force-te'n mipui hnawhdarh nana tear gas leh mock bomb an hman chuan mi 25 a hliam. Hliam tuar zingah hian journalist pawh an tel.

Meitei hnam chenna, valley district lama Civil Society Organisations (CSOs) lian ber, Coordinating Committee on Manipur Integrity (COCOMI) chuan Bishnupur leh Churachandpur ramria Army-te'n National Highway an dan chu ṭhiah tumin kawng zawh hi an huaihawt a ni.

Imphal valley-ah curfew puan ni mah se, Nilainia COCOMI-in kawng zawh an huaihawtah hian mipui tam tak an pung khawm. Kawngzawhtute hian Kwata ground aṭangin bul an ṭan a, security-te chuan Phougakchao Ikhai-ah an lo dang a ni. Hemi rual hian Phougakchao Ikhai-ah vek sit-in protest neih a ni bawk. COCOMI chuan Army-in Meitei-te chenna hmun Phougakchao Ikhai aṭanga Torbung Bangla community hall inkara National Highway an dan chu duh loin, ṭhiah an tum a ni.

State khawpui, Imphal aṭanga km 25 vela hla, Bishnupur district-a Phougakchao Ikhai hmuna mipui pung khawmte hnawhdarh nan security force-te chuan tear gas leh mock bomb-te an hmang a ni. Hliam tuarte hi Bishnupur district hospital-ah hruai nghal an ni a, an zinga ṭhenkhat chu Imphal lamah thawn an ni.

COCOMI sawi danin, an pawl chuan sorkar leh thuneitute chu August 30 hmaa Army-in kawng an dan chu titawp turin an ngen tawh a, mahse, an thil ngen chu tihhlawhtlin a ni lo. Army barricade leh bulletproof motor lian tak pahnihin kawngpui a dan tlat avangin, Meitei chhungkuate chuan veivahnaah harsatna nasa tak an tawk tih COCOMI chuan an sawi.

Bishnupur district-a Khougakchao Ikhai-a kawng danna hmun hi Imphal leh Churachandpur inkalpawhna kawngpui a ni a, COCOMI-te chuan helaia kawng dan hi ṭhiatin Torbung hmunah sawn zawk turin an duh a ni. Helai hi tribal pawl Indigenous Tribal Leaders Forum (ITLF)-in tualchhung buaina chhuaka Kuki-Zo mi 35 thite ruang phum an tumna hmun khan a ni.

Manipur sorkar chuan daidanna siam hi an sawn tawh avangin COCOMI-in kawng zawh an tum chu chu ṭhulh turin a lo ngen tawh a ni. Mahse sorkar ngenna hi zawm loin, kawng hi an zawh lui ta tho a ni.