Assam: PepsiCo-in manufacturing unit din nan Rs vbc 778 ruahman

PepsiCo chuan a vawi khatna atan Assam-a Nalbari district-ah ei tur siamna manufacturing plant a din dawn. Hei hi hmarchhak state-te tan bika ruahman niin, kum 2025-ah hman theiha peihfel tum a ni.

PepsiCo India chuan loneitute chu technology ṭha, alu chi quality ṭha leh khawl pein, Lay's siam chhuahna tur alu ton 50,000 thar chhuahtir a tum.

He plant hian kum rei lote chhungin alu ton 60,000 vawn ṭhatna tur cold storage pawh a siam thuai dawn tih PepsiCo chuan an thuchhuah siamah an tarlang.

Nalbari ditrict-a AIDC Industrial Park-a plant sak turah hian Rs vbc 788 sen a ngai dawn nia chhut a ni a, peih fel a nih hunah mi 500 bawr vel hnathawktu lak an ni ang.

PepsiCo India chuan helai hmuna hmeichhiate hna siamsak turin Assam Skill Development Mission and Directorate of Employment leh Craftsmen Training tripartite MoU an ziahpui bawk a ni. He plant hian MSME industry, thil pack nana hman chi laminate, carton, scrap leh tualchhung industry dangte tan hna a siam belh ang.

"Loneitute tihhmasawn a, hna siam belh hmang hian sorkarin alu thar chhuah lama intodelh tuma hma a lakna chu tihhlawhtlin kan tum a ni. Kan thil tih hmang hian Assam hmeichhiate chawikan a, training ṭha leh an tana ṭha tur thil chhawpchhuah zel kan tum dawn a ni," tiin PepsiCo India President Ahmed ElSheikh chuan a sawi.

Nilainia PepsiCo India Food Manufacturing Plant-in Nalbari district-a bhumi-pujan ceremony a hmannaah Assam chief minister Himanta Biswa Sarma pawhin thu sawiin, Nalbari-a Pepsico India-in plant 6-na siam a tum chu state tana thil chhinchhiahlak a ni, a ti.