Manipur : Tengnoupal-ah buaina thar chhuak leh

Manipur-a Tengnoupal district-a Pallel hmunah nimin khan buaina a chhuak thar leh a, mi pakhat a thi a, hliam eng emaw zat an awm bawk nia tarlan a ni.

Indigenous Tribal Leaders Forum (ITLF) media cell chuan, "Zing dar 7 bawr velah khan Manipur Police Commando hona hnuaiah, Meitei militant-te chuan Tengnoupal District-a Kuki-Zo khua Pallel chu an bei a ni. Khaw mipuite chu sahimna zawngin an tlanchhia a, Meira Paibis tam tak Pallel khawlaiah hmuh an ni," tiin an sawi.

Buaina thlenna hmun hi Kakching leh Tengnoupal district inrina bula hmun pahnihah a ni. Zing dar 7 velah Meitei militant leh security force-te hi an inkap a, chawhnu dar 1 vel thleng khan an inkap chhunzawm nia sawi a ni. Hemi hnu hian tualchhung mi, a bikin Meitei hmeichhe pawl, Meira Paibis mi leh sate chu an pung khawm zui bawk.

Assam Rifles leh Manipur police-te chuan mipui pung khawmte hnawhdarhna nan van lam hawia silai an hmeh puah bakah tear gas-te an hmang.

Security force-te chuan buaina chhuahna hmuna civil mi awmte chu thiar chhuah hna thawk nghalin, mipuiin lungawi lohna lantira buaina an chawk chhuak tur an veng nghal bawk. Pallel khaw mipui ṭhenkhat chu school-ahte leh BSF camp-ahte an biru a ni.

Ningani khan Bishnupur district-a Phougakchao Ikhai khuaah Meitei pawl mi leh sa sang tel chu pung khawmin lungawi lohna an lo lantir tawh bawk a, sipaite'n kawngpuia daidanna an siamte chu tihchhiat leh paltlang luih an tum a, security force nen pawh an innawr buai a ni. Hemi hnu hian Valley district pangaah full curfew puan zui a ni bawk.