Tripura by-election-ah BJP chak

Tripura-a Dhanpur leh Boxanagar assembly biala by-election neih zawh takah rorel lai BJP an chak.

Election Commisison chuan nimin khan by-election result hi puangin, Boxanagar bialah BJP candidate Tafajjal Hossain chu thlan tlin a ni a, Dhanpur bialah BJP candidate Bidu Debnath pawh a chak tih a tarlang.

Hetih lai hian eptu party, CPI(M) chuan inthlanah hian BJP chu vote tichingpenah an puh a, hemi chungchang hi an thlen hnu pawhin Election Commission chu hma la duh lohah an puh bawk. Hei vang hian vote chhiar pawh hi an boycott a ni. Tun ṭum by-election neihah hian eptu party pahnih, Tipra Motha leh Congress chuan candidate an dah lo a, BJP leh CPI(M) party pahnih an inbitum a ni.

September 5-a seat pahniha by-election neihah hian vote 86.50% a tla a ni. BJP hian seat pahnih an lak belh leh tak avangin member 60 awmna, Assembly-ah MLA 33 an nei ta a ni. An thawhpui, IPFT chuan MLA pakhat an nei. Eptu pawl lamah Tipra Motha chuan MLA 13 neiin, CPI(M) in 10 leh Congress party-in MLA pathum an nei.