Assam-in state pumah AFSPA titawp turin sorkar laipui ngen

Assam chief minister Himanta Biswa Sarma chuan Assam cabinet chuan an state-a sipai thuneihna sang pekna, Armed Forces (Special Powers) Act (AFSPA) leh Disturbed Areas Act hman mek chu titawp tawh turin sorkar laipui a ngen tih a sawi.

CM Sarma hian New Delhi-ah union home minister Amit Shah pawh a hmu a, Assam aṭanga AFSPA hnuh kir vek a nih theih dan turte an sawi dun tih a tarlang a, sorkar chuan Home Minister thurawn anga hma a lak zel tur thu a sawi bawk.

Armed Forces (Special Powers) Act (AFSPA), 1958 hnuaiah hian disturbed area-a puan hmuna awm armed force-te chu ṭha an tih anga chetla tur leh warrant tel loa tu pawh man theihna pek an ni. Armed force-te chuan mi an lo kap hlum a nih pawhin, khawtlang inrelbawlna ṭha kalpuina tur atana tih a nih chhung chuan pawikhawih an nih loh bakah, man theih an ni lo bawk a ni. AFSPA hnuaiah hian armed force-te an duhthala an chet tlat theihna turin hmun emaw district emaw chu “disturbed area”-ah puan a ni ṭhin.

Assam-a disturbed area puanna thuchhuah hi kum 1990 khan tihchuah niin, a boruak a zirin pawhsei zel a ni. Nikum khan state chhunga district 10 tih loh chu disturbed area an nihna hlihsak an ni a, tunah hian district pariatah tihtlem a ni leh.

Disturbed area la ni mek district pariatte chu - Dibrugarh, Tinsukia, Charaideo, Sivasagar, Golaghat, Jorhat, Karbi Anglong leh Dima Hasao-te an ni.

August thlaa Independence Day lawmnaah khan CM Sarma chuan state pumah kumin chhunga AFSPA hlih a nih theihna turin sorkar chuan theihtawp a chhuah dawn tih a sawi.

AFSPA hlip tura ngenna hi sorkar laipuiah ṭum 62 theh luh a nih tawh thu sawiin Chief Minister chuan, “Hmarchhak lam hi tunah chuan firfiaka chetna thleng ṭhin lakah an fihlim tawh. Kum thum liam ta chhung khan Assam-a hel pawlte nen inremnna thuthlung pali ziah a ni a, hel 8000 chuang chu an lo kir leh tawh a ni,” tiin a sawi.