Tripura: Land Custom Station-ah Nischintapur Railway Station puan a ni

Sorkar laipui chuan Tripura-a Agartala Railway Station leh Bangladesh-a Akhaura Railway Station pawhtu, Nischintapur Railway Station chu Land Customs Station (LCS) a puang.

Tripura-ah Land Custom Stations(LCS) pariat a awm mek a, Agartala, Srimantpur, Muhurighat, Khowaighat, Dhalaighat,Manughat, Old Raghnabazar leh Sabroom-te an ni. Dhalaighat LCS chu immigration atan chauh hman niin, Sabroom LCS chu hman ṭan a la ni lo.

Agartala LCS chu Integrated Check Post atana tih changtlun niin, Land Port Authority of India (LPAI)-in an enkawl a ni.

Tripura tourism leh transport minister Sushanta Chowdhury chuan India sorkar chuan Nischintapur Railway Station chu Land Customs Station atana puangin, thuchhuah a siam tih September 6 khan a tarlang. “Bangladesh kaltlanga Agartala-Akhaura rel kawng hawn tumin hma kan la mek. India prime minister Narendra Modiji, union railway minister Ashwini Vaishnab leh kan state chief minister Professor (Dr) Manik Saha chungah kan lawm takzet,” tiin Transport Minister chuan a sawi.

Tun hnaiah Akhaura-Agartala railway line zinga mi, Akhaura aṭanga Nischintapur inkara tlan tur gang car chu hlawhtling taka enchhin a ni.

Bangladesh leh Tripura inkalpawhna tura rel kawng siam mekah hian Railway Ministry chuan Rs vbc 153.84 a lo pe tawh a ni. He project atan hian Rs vbc 862.58 ruahman a ni. Bangladesh-a Chattogram and Mongla port leh India state ṭhenkhatte inkara bungraw phurh nan hman a ni ang. He hmalakna hian ramri hrula awmte tan sumdawnna leh khawsak phungah hmasawnna a thlen beisei a ni.