ITBP-in border outpost siam belh dawn

The Indo-Tibetan Border Police chuan China ep, Arunachal Pradesh sector-ah border outpost siam belh leh sipai lak tharte dan turin thutlukna a siam.

Tun hnaia China sorkarin Arunachal state an rawn chuh hnuah leh, Chinese ramri duty-te’n eastern sector-a Line of Actual Control (LAC) huangtau takin an rawn pel zel tih report a awm hnuah he thuthlukna hi siam a ni.

China chuan kar liam ta khan “standard map” 2023 edition tlangzarhin, Arunchal leh Aksai Chin chu Chinese territory chhungah awm angin a tarlang a ni.

“ITBP hotute chuan border outpost thar siam belhin, sipai lak tharte chu Arunachal Pradesh state chhung Chinese sipaite’n an beih fo ṭhinna hmunah dah an ni ang,” tiin ITBP official chuan a sawi.

ITBP paramilitary force hi Chinese frontier-a India-in ram venghimtu a daha a hmatawng ber niin, India army-te chu an hmungah hian dah an ni bawk.

China sipai-te chuan Arunachal ramri an rawn pelh fo avang leh an ralthuamte an tih changtlun belh zel avanga border outpost siam belh tum an nih thu sawiin ITBP official chuan a sawi. “Outpost siam belh leh sipai lak belh chuan China sipaite’n India ramri an rawn pelh fona hmuna an che vel chu uluk takin an vil thei dawn a ni,” a ti.

February thla khan Central sorkar chuan ITBP chu battalion pasarih (mi 9,400) lak belh phalna a lo pe tawh a, battalion thar pasarih zinga pathum chu dah chhuah turin an inpeih tawh.

Intelligence report tarlan danin, China sipaite chuan tun hnai thla 8-10 liam ta chhung khan India ramri an rawn luh belh zel a ni. China sipai 500 chuang chuan Arunachal-a LAC hi nikum December khan rawn pel tawhin, India sipaite duty-na hmunte an tichhia a ni. Hei vang hian Tawang bula ft 17,000-a sang Yangtze hmunah buaina a chhuah phah hial.

Defence minister Rajnath Singh chuan China sipaite chuan LAC chu pelin, Yangtze hmuna inremsiamna awm sa chu an rawn tidanglam a, mahse, India sipaite'n an lo dang thei a ni, tih Parliament pawh a lo hrilh tawh.

Ram pahnih sipaite hi eastern Ladakh-a ramri hmun hrang hrang, May 2020 aṭang khan an lo inhmachhawn fo tawh bawk a ni.