Assam : Child-marriage tihtawpna tur beihpui thlak leh dawn

Assam chief minister Himanta Biswa Sarma chuan Pathianni khan a kaihhruai sorkar chuan state chhunga kum tling lo naupang inneihtir, child-marriage tihtawp tumin beihpui a thlak leh dawn tih a sawi.

Bharatiya Janata Party (BJP) women's wing's national executive meeting a hmanpuinaah Chief Minister chuan, child marriage tihtawp tuma beihpui thlak thawh hnihnaah hian, Assam police-te chuan ni 10 chhungin kum tling lo hmeichhia nupuia nei, mipa 2000-3000 inkar an man tur thu a sawi bawk.

Himanta Biswa Sarma chuan child marriage tihtawp tuma beihpui thlak thawh hnihna kalpui tur hian G20 summit zawh hun a nghak tih sawiin, "Assam-ah thla ruk liam ta khan child marriage case-ah mi 5000 man an lo ni tawh. G20 tawp hun ka nghak a ni. Child marriage hi kan tihtawp a ṭul avangin tun ṭanga ni 10 lo awm tur chhungin, mi 2000-3000 ka man leh ang," tiin Sarma chuan a sawi.

"He thil thlen lohna tur hian dan siam a ni. Hei hi kalpui chhunzawm a nih zel chuan, mi ṭhenkhat fanute chuan engtikah mah hma an sawn thei lo ang. Dik lo taka enkawl an ni reng dawn a ni," a ti bawk. Sarma chuan triple talaq, child marriage leh polygamy tihtawp chu Muslim-te tana a hna thawh a ni tiin, hetiang hi Congress sorkarin an la ti ve ngai lo niin a sawi zui.

Kumin February thla khan Assam Police chuan child marraige kaihhnawihah mi 2666 an lo man tawh a ni. Kum tling loa nupui/pasal neih (Child Marriage) hi The Prohibition of Child Marriage Act, 2006 chuan India ram chungah a khap a, Child Marraige victim-te venhim leh ṭanpui hna pawh sorkar kutah a awm a ni.