Arunachal Pradesh: Itanagar-ah pawl 10-in nawrh huaihawt dawn

Arunachal Postal department-in hna a lak tharah Arunachal hnam ni lo candidate-te a lak avanga lungawi loin, state chhunga pawl hrang hrang 10 chuan vawiin hian state khawpui Itanagar-ah a huhoin nawrh an huaihawt dawn.

Nawrh huaihawt tumte hian state chhunga post office 866-a hna ruak 2,596 awmte hnawhkhahna atana Arunachal hnam ni lo lak tharte appointment chu cancel nghal turin an phut a, post office job recuitment rules-ah an hnam ṭawng telh turin an phut bawk.

Nawrh tum zingah hian Save Arunachal Save Indigenous (SASI), Save Arunachal Youth Association (SAYA), Indigenous Movement Against Corruption and Reformation (IMAC&R) leh Arunachal Nari Shakti (ANS)-te pawh an tel a ni.

"Kan state-a hna nei lo ṭhalaite chu Gramin Dak Sevak (GDS) post hnawhkhah turah hian dik lo takin en kan an ni," tiin nawrh huaihawt kaihruaitu tur Raj Pao chuan a sawi.

"Postal department hian inkaihhruaina hi zawm se chuan, Arunachal Pradesh ṭhalai sang chuangin hna an hmu thei dawn a ni," tih SAYA president Likhr Rajnik chuan a sawi bawk.