Manipur : In leh lo chante tan sorkarin in 1,000 sa dawn

Manipur sorkar chuan a thawh khatna atan tualchhung buaina avanga in leh lo chante tan an awm nghehna tur in 1000 a sa dawn a, hemi atan hian Rs. vbc 75 ruahman a ni. Information and public relations minister Dr. Sapam Ranjan chuan hemi chungchang hi sawiin, state chhunga tualchhung buaina chhuak tuartu awmna district hrang hrangah kalpui vek a nih tur thu a sawi.

Kar liam ta Inrinnia CM Secretariat-a ṭhu khawm state cabinet chuan in sa tura thutlukna hi an siam tih IPR Minister chuan a sawi bawk. Dr. Sapam Ranjan chuan May 3-a Manipur tualchhung buaina chhuak kal zelah mahni in leh lo chante tana Permanent Housing Scheme siam chu state cabinet chuan a pawm tih a sawi.

Police report-a a lan danin, buaina chhuak avanga state chhunga in tihchhiat zawng zawng hi 4,806 a tling a ni. Cabinet chuan in leh lo tlanchhiatsante chu an chenna ngaia an kir theihna tura boruak a awm a nih phawt chuan, an hmun ngaia in sak-sak turin a ti a ni.

IPR Minister chuan in sakna tura sum hman theih zat sawiin, pucca house-ah Rs nuai 10, semi-pucca house-ah Rs nuai 7 leh kuccha house-ah Rs nuai 5-te an ni. In sakna tur sum hi instalment hnihah pek chhuah tur niin, a vawi khatnaah chuan 50%; hei hi in sak ṭanah pek chhuah a ni ang a, a thawh hnihna chu a hnu deuhah pek chhuak leh tur a ni ang.

Cabinet meeting-ah hian, September 8-a Tengnoupal district-a central security force-in civil mite kut an thlak chu an dem thu an sawi a, he thil thleng chungchang hi central lam hriattir an rel.

Cabinet chuan an state-a Disturbed Area-a puan chu thla ruk dang pawhsei an remti bawk

Kongkokpi-ah Kuki-Zomi hnam mi 3 kap hlum

Kangkokpi district-ah nimin khan buaina chhuak thar lehin, Kuki-Zomi hnam mi pathum chu kah hlum an ni.

Security force-te chuan he pawikhawihna hi zing dar 7 vela thleng a ni tih sawiin, Kuki-Zomi mi pathumte chuanna motor chu Ireng Naga village bulah ralthuam kengte'n lo ambush-in, an lo kap hlum niin an sawi.

Kangkokpi-based civil society organisation, Committee on Tribal Unity (COTU) chuan inbeihna thleng chu an dem thu sawiin, sorkar laipui chuan an state-a buaina chinfel a, boruak ṭha a awm a duh tak zat chuan valley district zawng zawng chu disturbed area-ah puangin, Armed Forces (Special Powers) Act, 1958 hmang turin an phut tih an sawi a ni.