Nagaland Assembly monsoon session-ah bill 3 pu lut

Ni li awh Nagaland Assembly monsoon session chu Thawhṭanni aṭang khan ṭan a ni a, a ni khat niah hian bill pathum put luh a ni a, Act pakhat chu hman zui tawh loh tura tihtawp (repeal) a ni thung.

The Employment of Manual Scavengers and Construction of Dry Latrines (Prohibition), Act, 1993 chu tihtawp niin, a aiah Prohibition of Employment as Manual Scavengers and their Rehabilitation Act 2013 chu hman a ni tawh ang.

House chuan Protection of Children from Sexual Offences (POCSO), Amendment Act, 2019, leh Protection of Children from Sexual Offences (POCSO), Rules, 2020 hmanna tur resolution a pawm bawk a ni.

Act tihtawpna motion leh resolution chu chief minister Neiphiu Rio-a'n a pu lut ve ve a ni.

House-ah hian bill pathum put luh niin, minister for health and family welfare, P Paiwang Konyak chuan Nagaland Motor Vehicles Taxation (Amendment) Bill, 2023 leh Nagaland Passengers & Goods Taxation (Amendment) Bill, 2023-te a pu lut a, minister for higher education, Temjen Imna Along chuan North East Christian University (Second Amendment) Bill, 2023 a pu lut.

Assembly Speaker Sharingain Longkumer chuan bill pathum put luhte hi nimina ngaihtuahho turin a ti.

Assembly secretary-in-charge Khruohituonuo Rio chuan Nagaland Municipal Act 2001 (Repeal Bill, 2023), Nagaland Fire and Emergency Services Bill, 2021, Nagaland Goods and Services Tax (Sixth Amendment) Bill, 2022, Nagaland Appropriation Bill (No.1), 2023 leh Nagaland Appropriation Bill (No.2), 2023-te chu Governor-in a pawm tawh tih a sawi bawk. Heng bill-te hi Assembly session March thlaa neih takah House chuan an lo pass tawh a ni.