Tripura : BJP leh TIPRA party worker-te intibuai

Tripura-a Sepahijala district-a Murarbari hmunah sorkar lai Bharatiya Janata Party leh TIPRA Motha party worker-te inkarah buaina a chhuak a, mi ṭhahnem takin hliam na lutuk lo an tuar. Hliam tuar zingah hian Takarjala police station officer in charge leh TSR (Tripura State Rifles) trooper-te pawh an tel.

Tualchhung mite sawi danin, BJP state president Rajib Bhattacharjee-a telna Jampuijala community hall-a BJP party inhmuh khawm avangin zing kar aṭanga boruak a inmung ṭan tawh a, Hall bul lawkah hian party worker pahnihte inkarah buaina a chhuak ta a ni.

Programme zawh hnu, BJP activist-te haw lamah buaina hi chhuakin motorcycle pahnih leh scooter pakhat tihchhiat a ni.

Buaina chhuak tihreh tumin Takarjala police station OC Rathin Debbarma hoin police ṭhahnem tak leh TSR trooper-te chu buaina chhuahna hmunah hian an kal nghal a, pung khawmte nena an innawr buainaah TSR Jawan pahnih leh OC chuan hliam an tuar ve bawk.

Thil thleng chungchang hi sawiin SDPO Jampuijala Jayanta Karmakar chuan, "Tun thlengin tu mah man an la ni lo. Buaina chhuak lai video-te lak khawm niin, en let mek a ni. Hemi hmang hian police-te chuan thil sual titute chungah action an la ang. Hemi kaihhnawihah hian FIR pawh theh luh a ni tawh," tiin a sawi.

Murarbari bialtu TIPRA Motha MLA Biswajit Kaloi chuan buaina chhuah chhanah BJP-te puhin, TIPRA Motha worker tumahin political party dang tihnat an tum lo tih a sawi.

BJP Tripura State President Rajib Bhattacharjee erawh chuan he thil thleng hi tum lawk a ni tia sawiin,"Dan kengkawhtute chungah hian rinna kan nghat tlat a, police-te chuan na takin action an lak ngei kan beisei," tiin a sawi ve thung.