Manipur : MLA 23-in state ramri venghim turin resolution siam

BJP kaihhruai Manipur sorkara MLA 23-te chuan tualchhung buaina tuar mektu Manipur state ramri chu venghim tlat tura intiamin, resolution an siam.

MLA-te chuan an state-in harsatna a tawh mek chu sukiang tura central hotute ngen tura Delhi-a kal vat an rel bawk.

Resolution sign-tute zingah hian chief minister N Biren Singh erawh a tel ve lo.

CM secretariat-a pawl indin thar Youth of Manipur-te meeting an neihpui hnuah, resolution siamtu MLA rualte chuan Kuki-Zo hnamte'n inrelbawlna hran an ngiat chu thil pawm theih a ni lo tih an sawi."Legislative member resolution sign-tu zawng zawngte chu inlungrual takin Manipur huam chin venghim turin kan ding reng a, inrelbawlna hran eng chi mah kan pawm thei lo ang," tiin resolution-ah chuan a inziak.

Thawhṭanni zan khan Youth of Manipur member sang chuang chu CM hmuh tumin CM bungalow an pan a, mahse, security force-te chuan mi tlemte chiah luh tlang an phalsak a ni.

CM nena meeting an neihnaah hian YOM member-te chuan Kuki MLA 10 chu inrelbawlna hran neih an phut avangin an chungah legal action la turin CM chu an phut tih an hrilh. Hei bakah hian, MLA 10-te chungchang ngaihtuah leh, state chhunga National Register of Citizens (NRC) exercise neih chungchang sawihoa special assembly session nei turin an phut bawk.