Meghalaya sorkarin hydropower project 2 a cancel

Meghalaya cabinet chuan Thawhlehni khan an state-a power project pahnih - 450 MW Kynshi stage-I leh Upper Khri Stage I & II-te chu a cancel.

Meghalaya chief minister Conrad K Sangma chuan sorkar chuan private power developer-te chu kum tam tak liam taah khan hydropower project pahnih thawk turin inremna a ziahpui tih a sawi.

Thawhhona thuthlung, Memorandum of Agreement (MoA) chu Kynshi hmuna thawhna turin M/s Athena Projects Pvt Ltd nen 11-12-2007 khan ziah a ni a, The Upper Khri stage I & II chu kum 2012-13 khan M/s SM Energenco Ltd-te ziahpui a ni thung.

"Heng project-te hi pawisa thawk chhuak thei an nih loh avang leh, a thawh chhung rei leh a thawh man a san avangin cabinet chuan project pahnih - Kynshi stage– I and Upper Khri stage– I & II-te chu titawp turin thuthlukna a siam ta a ni," tiin CM Sangma chuan a sawi.

Sangma chuan thawhpui tur dang an zawng leh thuai dawn tih a sawi a, tuna hnathawh dan chu a rate a san em avangin chhunzawm chi a ni tawh lo a, sorkar chuan a ngai an thawhpui leh dawn a nih pawhin, inremna thar siam leh a ni ang, a ti.

Technology thar hmanga khawlphetha siam chhuah chungchang sawiin CM chuan, power storage leh facility dang hmangte pawh hman theih a nih tawh bakah, Upper Khri Stage I & II-a tih ang hian, project pakhata tui hman chu a chuan hnuai lama project-te tan hman leh theih a nih tawh avangin project hmelhmang pawh thlak a ngai dawn tih a sawi. "Chuvangin sorkar leh department chuan hemi lamah hian hma an la nghal a, project thar a hma thei ang bera thawh theih kan beisei," a ti.

Chief Minister chuan Kynshi Stage-I contract an tihtawp chhan ber chu contractor-te'n hna thawh an tihkhawtlai nasat vang tih a sawi bawk.