Manipur: Rorel lai MLA 18-te PM leh HM hmu turin Delhi-ah kal

Manipur state chhunga hnam leh hnam inkara buaina chhuak tihreh dan ngaihtuahin, BJP kaihhruai Manipur sorkara MLA 18-te chuan Prime Minister leh Union Home Minister hmu turin Nilaini khan New Delhi an pan.

MLA rualte hi cabinet minister pahnih - education minister Th Basantakumar leh social welfare minister H Dingo-te'n an ho a ni.

September 11 zan khan BJP kaihhruai Manipur sorkar MLA 23-te chuan Manipur ram huam chin venghim tlat turin an in tiam a, resolution pawh an siam nghe nghe a ni. Resolution hi Chief Minister secretariat-ah sign niin, resolution sign-naah hian pawl indin thar Youth of Manipur (YoM) member-te pawh an tel.

Resolution-ah hian Manipur huam chin tihdanglam loh te, inrelbawlna hran awm thei chi hrim hrim dodalte leh state chhung buaina chingfel tura Central lam hotute ngente a tel a ni.

Manipur youth affairs and sports minister Govindas Konthoujam chuan central leh BJP hotute be rawnin Delhi-ah hian a lo kal hmasa tawh a, ani bakah hian IPR and health minister Dr Sapam Ranjan pawh hemi chungchangah tho hian Delhi-a kal a tum ve bawk.

September 11 zan khan YoM volunteer sang chuang chu chief minister N Biren Singh hmuh tumin Imphal-a Chief Minister bungalow an pan a, mahse, Moirangkhom-a Hicham Yaichampat hmaah Rapid Action Force (RAF) leh state force-te'n an lo dang. Police-te nena an inrem hnuah, YoM aiawh hian mi 100-te chu Chief Minister hmu turin bungalow luhtir an ni.

May thla aṭanga Manipur-a Meitei leh tribal hnam inkara buaina chhuak hian ziaawm lam a pan hlei thei lo a, buaina chhuak thar a la awm reng a ni. Tualchhung buaina chhuaka thi hi mi 160 chuang ni tawhin, mi tam takin hliam an tuar bawk. Chenna in leh sakhaw hmun pawimawh tam tak tihchhiat leh hal a ni bawk a ni.