Assam Assembly aṭangin eptu MLA-te chhuak tau

Assam Assembly session neih mekah, chief minister Himanta Biswa Sarma-a nupui, Riniki Bhuyan Sharma company-in central subsidy a la nia puhna chungchang house-a sawiho an dilna chu Speaker-in a hnawl avangin, eptu MLA-te chu house aṭangin an chhuak.

Nilainia Assam assembly session ni lina neih chu inhnialna nasa tak nena bulṭan niin, Speaker Biswajit Daimary-a'n boruak khap daihna tura minute 15 chhung House a tihtawp lailawk laiin eptu MLA-te hi an chhuak a ni.

Eptu MLA-te chuan CM Himanta Biswa Sarma nupui company-in central scheme hnuaiah Rs vbc 10 subsidy a la nia puhna chungchang chu assembly-ah sawiho ngiatin, house chhungah an inau buai nasa hle.

Assam Congress chuan hemi chungchang sawiho theihna adjournment motion notice pe mah se, Speaker Biswajit Daimary chuan Question Hour zawh hnuah notice chu hnawlin, sawiho a phal lo.

Speaker rorel dan chu pawm duh loin, Congress leh CPI-M MLA-te leh Independent MLA Akhil Gogoi-te chu thuziak kengin Well-ah an chhuak khawm zui a ni.

Nilaini vek khan Congress MP Gaurav Gogoi chuan social media-ah document post-in, he document-ah hian Assam CM nupui Riniki Bhuyan Sarma-i company Pride East Entertainment Private Limited chu APC scheme hnuaiah gro-processing cluster project zinga pakhat anga tarlan a ni.

"Sorkar aṭanga grant, Rs vbc 10 dawng tura phalna pek a ni tawh. Website hi hack a nih leh nih loh finfiah turin union minister hnenah report rawh u," tiin Congress MP chuan a post.

Assam CM chuan, "Kei leh ka nupui leh a telna company engmah hian sorkar laipui aṭangin subsidy engmah kan la dawng lo tih hi ka sawi chiang duh," tiin X-ah a post thung.