Dalai Lama-a'n Sikkim tlawh dawn

Tibet sakhaw hotu, Dalai Lama chuan October thla hian ni nga chamin Sikkim a tlawh dawn.

Chief minister PS Tamang-Golay chuan Dalai Lama chu October 10-14 chhung Sikkim-ah a cham dawn tih a sawi a, Dalai Lama dawngsawng tur hian an inpuahchah nghal thu a sawi.

Dalai Lama-a'n Sikkim state a tlawh tur chungchang ngaihtuahin September 13, Nilaini khan Sikkim CM PS Tamang-Golay chuan meeting a ko a, meeting hi Mintokgang-ah neih a ni.

"Kan sorkar hian His Holiness chu kan state tlawh turin hun rei tak ata kan lo sawm tawh a, a lo kal thei tur hi kan state tan chuan thil hlu tak a ni," tiin Chief Minister chuan a sawi. Dalai Lama pual hian committee hrang hrang an din dawn a, CM chu a committee lian berah chief patron-ah a awm ang. Kumin April thla khan CM Tamang hian Dalai Lama hi Delhi-ah a lo hmu tawh bawk.

Sikkim-ah hian Buddhist sakhaw zuitu hi 28% vel an awm a, Tibet mi tam tak khawsa an awm bawk a ni. Kum 2010 khan Dalai Lama hian Sikkim hi a lo tlawh tawh a ni.