Assam-in Sachs Model hmang dawn

Assam Chief Minister Tarun Gogoi chuan Assam chu ram chhunga Sachs model hmangtu state hmasa ber a ni tur thu a sawi.

Koinadhara-a a chenna ina chanchin thar lakhawmtute a kawmnaah, Gogoi chuan economist lar, Jeffrey D Sachs-a model siam beh-chhan-in sustainable development agenda an kalpui dawn tih a sawi.

Sachs hi Columbia University-a Earth Institute Director a ni a, Millennium Development Goals (MDGs)-a United Nations Secretary General Special Adviser a ni bawk. Sachs hian khawvel puma retheihna umbo dan tur leh hmasawnna rintlak kalpui dan tur a duang a ni.

Tarun Gogoi chuan model, Chief Minister's Vision Plan 2030 ah chuan organic farming, water preservation, afforestation, leilung hanna humhalh leh boruak bawlhhlawh tihtlem dan turte a tel dawn tih a sawi. "Assam hi ram chhungah he development model hmang hmasa ber tur a ni dawn a ni," a ti.

Chief Minister chuan state sorkarin 'Smart Village' project a kalpui tur thu leh, he project hmangin thingtlang khawtinte chu an mamawh ang pek a, anmahnia intodelh thei tura siam tum a nih thu a sawi. "State chhung mipui zinga 80% chu thingtlanga cheng an ni a, thingtlang khaw tinte tihhmasawn a, thingtlang aṭanga khawpuia pem intihhmuh kan chinte titawp tura hmasawnna thlentir kan tum a ni," a ti.