AP Adventure Tourism atan Cheng vaibelchhe 97 pe dawn

Sorkar laipui chuan Arunachal Pradesh-a tourism lam tihchangtlunna atan Rs. 97,13,67,718 a pe dawn.

State sorkar chuan sorkar laipuiah rawtna Integrated Development of New Adventure Tourism in Arunachal Pradesh tih chu a lo thehlut tawh a, hetah hian an state-a tourism lam tihmasawn theihna tur kawng hrang hrangte tarlangin, hemi atana infrastructure lama tihmasawnna a ṭul thu te, an mamawh hrang hrangte an sawilang a ni.

Integrated Development of New Adventure Tourism-in Arunachal Pradesh hnuaia proejct eng emaw zat duan zingah hian Nafra-a tourist complex siam te, Seppa-a rafting and angling center din te, Papu, Pasa leh Pakke Valley thuam ṭhatte, Ziro-a amphitheater din te, Yomcha sub-division infrastructure tihhmasawnna te a tel.

Sorkar laipuiin a sum sanction zinga 20%, Rs 19,42,73,544 chu Central Financial Assistance (CFA) in state sorkar hnenah hna thawh ṭanna turin a pe chhuak tawh a ni.

Chief Minister Nabam Tuki chuan tourism tihchangtlunna tur sum sanction chu an state mipuite tana kum thar thilpek hlu tak a ni tiin, sumte chu dik taka hmangin, hna pawh a hun taka zawh tum a nih thu a sawi. "Department chuan hna a thawk ṭan nghal dawn a, ṭul loa sum khawral a nih lohna turin hna pawh a hun taka zawh tum an ni. Project-te hi a thawhna tur sum pekchhuak aṭanga thla 30 chhunga zawhfel tura tih an ni" a ti.

CM chuan project hrang hrang thawhte enfiah leh a ṭul anga thurawn te pe turin Monitoring Committee din a rawt bawk a,anni hian sorkar laipui hnenah hnathawh kawnga hma an sawn dante regular takin report an pe ṭhin dawn a ni.