UALA leh Meghalaya sorkarin inremna ziak

United Athik Liberation Army (UA-LA) helpawl leh Meghalaya sorkar chuan kar kalta Zirtawpni khan inremna thu-thlung, Agreed Text of Settlement an ziak.

Inremna thuthlung ziahnaah hian Chief Minister Dr Mukul Sangma leh Home Minister Roshan Warjiri-te pawh an tel. Sorkar chuan helpawl dangte pawh tharum thawhna bansan a, sorkar nen inremna an siam theihna tura inbiakna neihpui turin a sawm nghal a ni.

State sorkar leh UALA te hian inremna thuthlung hi Tura-a Circuit House-ah an ziak a, helpawl aiawhin UALA chairman Novembirth Marak leh general secretary Nagra D-Shira-ten an ziak a, sorkar lam aiawhin Garo Hills division Commissioner and Secretary Peter Ingty leh Political Department Com-missioner and Secretary J Lyngdoh-ten an hming an ziak.

Chief Minister Sangma chuan inremna an siam thei chu an state tana ni chhinchhiah tlak tak a nih thu leh, helpawl dangte pawhin UALA te thiltih chu an rawn zui ve a beisei thu a sawi. Inremna an siam chu UALA member-te pawhin an vawn nun reng a duh thu a sawi bawk.

CM chuan hel pawl dang, Garo National Liberation Army (GNLA) leh Hyniewtrep National Liberation Army (HNLC) te chu dan kalha an chet
ṭhinte bansan a, inbiakna nei tura rawn che chhuak turin a sawm. State sorkar chuan mipuite an ngen angin hel pawl hrang hrang inbiakna neih duhte tan thla ruk hun an pek thu a sawi.