Meitei pawlin Manipur aṭanga Assam Rifles lak chhuah phût

Delhi-a Meitei pawl awm, Delhi Meitei Coordinating Committee (DMCC) aiawhte chuan Ningani, September 15 khan defence minister Rajnath Singh an hmu a, Manipur state aṭanga Assam Rifles-te la chhuak turin an phût.

Meeting hi Rajnath Singh-a chenna inah neih niin, DMCC-te chuan Manipur-a Assam Rifles-te chu central armed force danga thlak turin an phut. Hemi hma hian Manipur-a Meitei pawl lian tak Coordinating Committee on Manipur Integrity (COCOMI) chuan state aṭanga Assam Rifles-te lakchhuah an lo ngiat tawh bawk.

COCOMI chuan Manipur-a Meitei leh tribal-te inkara buaina chhuakah, India rama paramilitary force upa ber Assam Rifles-te chuan ṭan lam an nei tiin, state aṭanga lakchhuah an phut a ni.

Manipur-a Meitei hmeichhe pawl pawhin Assam Rifles-te chu duh loin, vawi tam tak lungawi lohna lantirin an nuar tawh bawk.