Assam state-ah AFSPA tihtawp a ni dawn

Assam state hmun ṭhenkhata Armed forced special powers acts (AFSPA) hman mek chu October thla hian a zavaiin tih tawp hman a rinawm tih Assam director general of police (DGP) GP Singh chuan a sawi.

Assam DGP GP Singh chuan Ningani, September 14-a Sivasagar leh Charaideo district security dinhmun a enfiahnaah he thu hi a sawi a ni.

Singh chuan Assam-ah boruak a ralmuan tawh avangin, Assam police-te chuan state pumpuia AFSPA hman mek chu ti tawp turin rawtna an thehlut tih a sawi a, sorkar laipui chuan October thla hian Assam-ah AFSPA hman chu a tihtawp a rin thu a sawi bawk.

Hemi hma hian state sorkar chuan, state chhung hmun ṭhenkhata AFSPA leh disturbed area act hman mek chu October 1-a hnukkir turin sorkar laipuiah rawtna a lo thlen tawh bawk a ni.

September 8-a chief minister Himanta Biswa Sarma hoa Assam cabinet meeting an neihah AFSPA chungchanga thutlukna hi siam niin, "State chhunga AFSPA leh Disturbed Area Act hman mek chu October 1-a ti tawp turin central sorkarah rawtna kan thlen a ni," tiin Sarma chuan a sawi.

CM chuan, "Thuthlukna tawp chu central sorkar siam tur a ni a, mahse heng dante hi hman a ngaih tawh lohna turin boruak ṭha kan siam a ni," a ti bawk.

AFSPA leh Disturbed Area Act-te hi state chhungah ULFA helna a nasat hunlai, kum 1990 aṭang khan Assam-ah hian hman ṭan a ni.