Meghalaya leh Assam CM-te inbia

Meghalaya chief minister Conrad K Sangma leh Assam chief minister Himanta Biswa Sarma-te chu Nilaini khan ramri chungchangah official loin an inbia a, ramri buaina hmun tlawh dun hmain hmalak dan turin sawia October thlaah inhmuh an tum.

Sarma chuan, "Kan hmun tlawh tumah hian boruak tih sosan kan duh lo. CM pahnihten Karbi Anglong – West Jaintia Hills ramri kan tlawh hnu lawkah buaina thar a chhuah leh si chuan mipuiin min dem dawn. Chuvang chuan mipuiin min rin ngamna tur ngaihtuah hmasak a ngai," tiin a sawi.

"Mipuiin min rin ngamna tur kan ruahman fel hnuah, ramri buaina hmunah kalin a khaw mipuite kan kawm ang. Langpih kan tlawh khan, boruak ṭha tak kan nei. Chutiang boruak ṭha tho chu Karbi Anglong leh Jaintia Hills-ahte ken kan duh a ni," a ti bawk.

Assam CM chuan Meghalaya CM nena inhmuh leh October-a ramri tlawh a duh thu sawiin, Meghalaya CM remchan dan azirin chawlhkar khatna emaw chawlhkar hnihnaah emaw kal a duh thu a sawi.

Regional committee-te report thehluh hun chungchang pawh sawiin Sarma chuan, "Tuna ramri buai mek hmun ruk hi tlemin a buaithlak deuh a, chuvang chuan regional committee-te hi lehlam lehlama mi puitling tak ve vein an ho a ni. Hah takin an thawk mek a, ramri buaina hmun an tlawh reng bawk. Felfai tak leh boruak ṭha tak hnuaiah thil engkim chinfel a nih kan ring," a ti.