Nagaland-in Forest Act hran siam dawn

Nagaland Legislative Assembly (NLA) chuan India danpui hnuaia Article 371(A)-in special provision a pek ang chauha state chhunga Forest (Conservation) Amendment Act 2023 hman a nih theihna turin Ningani khan resolution an pass.

Environment, forest and climate change minister CL John-a'n 14th NLA ni tawp ni second session-a eleven-point resolution a put luh hnuah, resolution hi pawm a ni.

NLA chuan Forest (Conservation) Amendment Act 2023 hnuaia Section 1(A)(2) chu state leh mipui tana pawi zawnga hman a ni lohna turin India sorkar chuan hma a la tur a ni, an ti bawk.

Member 60 awmna legislative assembly chuan hma lak theih dan kawng hrang hrang ngaihtuahin, chung zingah chuan state bil tana Act siam a, mimal emaw khawtlangin emaw ram ngaw atan ni lo forest land chu a hman a, environment a tihchhiat chuan central sorkar hnuaia scheme bakah, pawikhawihtu chu chawi tir theih dan tur siamte a tel a ni.

The Forest (Conservation) Amendment Act, 2023 chuan section thar section 1(A)(2) belhin, hemi hmang hian international border, Line of Control leh Actual Line of Control khawi lai hmun aṭanga kilometre 100 chin chu ram tan leh ram venhimna atana pawimawh thil siam/sak nana hman theih a ni.

International border aṭanga kilometre 100 hian Nagaland ram ngaw tam tak a huam a, helai ram neitu tam zawk chu tribal-te an ni.

Article 371(A) hnuaia 'land and its resources' hian ram ngaw leh leilung hausakna pawh a huam tel a, Forest Amendment Act-a Section 1(A)(2) hi Nagaland-ah hman a nih chuan tuna tribal hnamte chanvo hi a laksak dawn a ni, tiin resolution chuan a tarlang.