Sorkar laipuiin Manipur dinhmun ngaihtuah State sorkarin thi chhungte Rs nuai 5 in a ral dawn

Manipur state-a magnitude 6.7-a naa lirnghingin thil a tihchhiat hrang hrang leh state dinhmunte ngaihtuahin,sorkar laipui chuan a ṭul anga ṭanpuina a pek tur thu a sawi.

Lirnghing chungchanga information an dawn hnuah, Cabinet Secretary PK Sinha kaihhruaiin National Crisis Management Committee (NCMC) chuan New Delhi-ah meeting an nei nghal a ni.

Ministry of Home Affairs pawhin National Disaster Management Authority (NDMA), state sokar, Ministry of De-fence, NDRF, Ministry of Telecom leh department leh agency hrang hrangte thawh-puiin, lirnghing tuarte chhanchhuah leh chhawmdawl hna a thawk bawk.

New Delhi-a crisis management meeting-ah hian Secretary (Power), Secretary (Telecom), Member, NDMA leh DG (Indian Meteorological Department) te an tel a, Home leh Defence ministry aiawhte an tel bawk. Video link hmangin Manipur Chief Secretary chuan he meeting hi a lo chhim bawka ni.

Chhiat tawkte ṭanpui leh chhawmdawl hna thawk turin Guwahati aṭangin NDRF team pahnih, member 54 ve ve awmna chu Imphal-ah tirh an ni tawh. BSNL pawhin inbiakpawhna ṭha takin a kalpui thei tawh bawk. NDMA chuan Prime Minister Office (PMO) kaihhruaina angin hma a la a, PMO hian lirnghing hnua hmarchhak bial dinhmun chu ngun takin a thlithlai zui reng a ni.

Manipur sorkar chuan an staet-ah lirnghing vang hian mi paruk an thi a, mi dang 69 in hliam an tuar niin a sawi. State sorkar chuan thi chhungte hi Rs nuai nga
ṭheuhin a ral dawn tih a sawi bawk. Hliam tuarte hi RIMS, JNIMS leh private medical centre-ahte enkawl an ni.

CAF & PD and Education Minister Moirangthem Okendro chuan district hrang hrang thuneitute hnenah lirnghingin an district-a chhiatna a thlen dan kimchang report tura hriattir an nih thu a sawi.

Thawhṭanni zinga lirnghing na takin a sawi avangin Manipur-a zirna in hrang hrangte chu January 11 thleng khar an ni dawn tih official-te chuan an sawi bawk.