AP-ah mipui court-in Governor ban phut

Aruanchal Pradesh-a mipui court, Arunachal People Adalat buatsaihah mipui tam takin an state Governor JP Rajkhowa ban an phut. Arunachal People Adalat hi Thawhṭanni khan Naharlagun-a Rajiv Gandhi Stadium-ah huaihawt a ni a, he hunah hian mi 30,000 chuang zet an pungkhawm.

Mipui pungkhawmte chuan resolution siamin, "State mipuite chuan ram danpui leh democracy kalphung kalh zawnga Governor chet dan hi kan dem ta, tribal duhsak lo, hmasawnna ngai pawi-mawh lo leh mipuite ngaihsak lo zawnga cheah kan ngai a ni, rorellai party chhungah innghirnghona thlen tir a, state chhungah buaina leh inhuatnate siam a tum a ni" an ti. Resolution hi organising committee chairman leh MP hlui, Takam Sanjoy-an mipuite hriatah a chhiar chhuak nghal a ni.

Adalat-ah hian Minister, MLA leh zirlai pawl hrang hrangte an tel a, sorkar laipui hnenah state mipuite chuan Governor chu a awm chhunzawm zel chuan democracy-ah rinna an nghat ngam dawn lo a ni tiin, ko kir nghal turin an phut.

Resolution-ah hian AP-a Chakna leh Hajong raltlante chungchangah pawh sorkar laipui chu a rang thei anga ram chhung hmun danga an awmna ngaihtuah sak tur leh, tribal mite dikna chanvo humhalh sak tura an phutna thute an tarlang tel bawk.

State sorkar hnen-ah pawh Finance Minis-ter hlui, Kalikho Pul chu Nyhishi hnam chung-chang a sawi dan avanga khawtlanga buaina a chhuah phah avangin hrem turin an phut bawk a ni.