AASU-in Home Minister hnenah memorandum thehlut
All Assam Students' Union (AASU) chuan Union Home Minister Rajnath Singh-an an state a tlawh ṭuma ramri a enfiahnaa an ṭawiawm hnuin, minister hnenah hian kum 1971 hnu lama an state-a dan loa lut ramdang mite chu an state mi leh saah an pawm thei lo tih an sawi nawn lehin, memorandum an thehlut.
ASSU hruaitu, Dr Samujjal Kumar Bhattacharyya, Dipanka Kumar Nath leh Lurin Jyoti Gogoi-te chuan Home Minister hi kawm-in, Assam Accord, border security leh kum 1971 hnu lama dan loa pem lutte chungchang hi an sawipui a ni.
Thuchhuah siamin AASU chuan, "Sorkar laipui chuan Assam Accord a taka kalpui a duh thu a lo sawi a ni. Karminganj sector-a ramri chu kum 2016-ah hung zawh a ni ang a, Dhubri sector ami chu kum 2017-ah zawh a ni ang. Sorkar laipui chuan India leh Bangladesh ramri venhimna turin a bika ruahmanna siam pawh a remti a ni. India leh Bangladesh ramri, km 4096-a thui zingah km 263 hi Assam state ami a ni. Sorkar hian dan loa ramri kaltlanga rawn lutte venna hi khauh taka kalpuiin, security force-te pawh an kah phalsak hial se kan duh a ni" a ti.
AASU hian kum 1971 hnu lama ramdang mi, dan loa Assam-a pem lutte chu HIndu Bangladeshi angah an pawm dawn lo tih sawiin, cut-off date siam hmaa lutte pawh buaipui tham an ni tawh niin a sawi. Hemi chungchanga sorkar laipuiin hriattirna a lo siam tawh pawh sut leh turin an phut bawk a ni.