Hmarchhak helten Bangladesh-ah camp an nei: Sarkar

Tripura Chief Minister Manik Sarkar chuan hmarchhak biala hel hrang hrang, Tripura ami ngeite pawhin Bangladesh-ah camp an nei tih a sawi.

Bangladesh Prime Minister Sheikh Hasina kaihhruai sorkarin firfiakte laka beihpui a thlak dan chu a fak rualin, Sarkar chuan hmarchhak helhoin Bangldesh ram chhungah camp an la nei a ni, a ti.

Bangladesh-ah hian helhoin camp eng emaw zat an la nei a, Tripura helho pawhin camp hi 16-19 vel an nei a ni. Bangladesh sorkar hian an ram chhunga India hel awmte hi hnawhchhuah tumin hma chu a la reng a ni" a ti.

Bangladesh security force-ten helte hi an ram aṭanga umchhuah tumin an bei a, hetihlai hian India helte hian ramri chhengchhe laia security force awmlohna hmunte chu remchangah hmangin, camp an nei a, hetah hian an pawl mi leh sate chu ralthuam hman an inzirtir ṭhin niin a sawi.

Home portfolio changtu ni bawk, CM Sarkar chuan an state chhunga helte nuaimit tumin theihtawp an chhuah a, mahse an state chhung ngeiah pawh helho tawmbukte a la awm avangin hlawhtlingah an la inchhiar thei lo tih a sawi.

Hetihlai hian Tripura police-te chuan CM Sarkar hminga Facebook account lem lo siamtu man tumin an chhui mek. Kum 2014 khan CM hminga fake account siam vang hian police-te hian thubuai ziaklutin an lo chhui tawh bawk.

Sarkar hian Facebook leh email account a neih loh thu a sawi a, a hminga siam pawh tumah a phalsak loh thu a sawi bawk. Sarkar-a fake Facebook page-ah hian CPI(M) in an state-a ram neilote tana hna a thawhsak dan hrang hrang post eng emaw zat a awm a ni. Post pakhatah chuan a thupuiah 'Future PM India-Manik Sarkar' tih a awm. He account siamtu hi Police hnuaia Cyber Crime Branch chuan an chhui mek a, an manchhuah thuai an beisei thu police official-te chuan an sawi.