Assam inthlanah Congress mal ṭan dawn

Assam Legislative Assembly inthlan neih turah rorel lai party, Congress chuan party mala beih a tum niin Chief Minister Tarun Gogoi chuan a sawi. State Secretariat-a chanchin thar lakhawmtute a kawmna ah, Gogoi chuan, "Eng pawl dang nen mah seat insem kan tum lo. A hma pawhin party dang nen seat insem kan tum loh thu ka lo sawi reng tawh a ni.

BJP ni lo party dangte nen inhriatthiam tawnna kan nei niin ka sawi tawh a, mahse anni pawh kan thawhpui dawn lo a ni," a ti.
Assembly inthlan neih tura Cong-ress leh AIUDF te an thawk-dun dawn nia thuthang awm mah se, Gogoi chuan AIUDF president Badruddin Ajmal chu sawisel in, BJP nena inbiaktawnna an nei niin a puh.

Gogoi chuan, "Ajmal hian mipui hriatah Prime Minister Narendra Modi-an, 'Pakistan a tlawh ṭum khan eng nge a ei?' tia min zawh pawh in, hemi chungchang hi BJP chuan engmah an sawizawm duh lo. Engtin nge PM hi mawi lo taka a puh theih? Mi tu pawhin Modi chu vegetarian a ni tih an hria a, chuti chunga BJP in Ajmal thusawi an chhang let lo hi thil mak tak a ni. Ajmal laka BJP an nem tlat chhan hi eng nge ni ang?" tiin a sawi.

AIUDF leh BJP-te chuan tum thuhmun an nei a, chu chu Assam dinhmun leh harsatna an tawhte vawrh lar a ni, a ti.
Inthlan zawh hnuah party mala rorel thei an awm lo a nih chuan sorkar siam turin party dangte an thawhpui dawn em tia zawhna chu CM chuan chhang in, result chhuah hnuah an la ngaihtuah
ṭha dawn niin a sawi.

CM chuan BJP beih chhun-zawmin, state sorkar chuan BJP kaihhruai NDA sorkarin an state a ngaihthah dante ziaka tih-chhuah a tum tih a sawi.

Hetah hian central-a Cong-ress kaihhruai UPA sorkar lai leh NDA sorkar laia sorkar laipui
aṭanga state-in ṭanpuina a dawn a inthlauh dante an tarlang vek dawn niin a sawi bawk.