Manipur-ah mitthi ruang ngaihventu nei lo 96 la awm

Manipur-a sorkar hospital pathum- Imphal-a pahnih leh Churachandpur-a pakhat, ruang dahna hmunah mitthi ruang ngaihventu nei lo 96 an la awm.

May thla aṭanga tualchhung buaina chhuakah hian mi 175-in nunna an chan tawh nia chhinchhiah niin, ruang ngaihven lohte hi mitthi zat 55% an tling a ni. State chhunga buaina nasa tak chhuak vang hian valley leh hill district-te chu inṭhen hrangin, anmahni awmna lam ve veah an tawmim a ni.

Imphal-a hospital pahniha ruang ngaihven loh tam zawk chu Hill district lama mi nia rin a ni a, Hill district-a awmte chu Imphal Valley, Churachandpur leh Meitai tamna hmunahte chuan an kal tawh meuh lo.

May 4-a Imphal car wash-a a fanu leh hmeichhe dang an pawngsual rawna an thahsak tribal pakhat chuan a fanu ruang, Jawaharlal Nehru Institute of Medical Sciences-a an dah chu tun thlengin a la la ngam lo a ni. “Imphal-a kan kal theih loh avangin ka fanu leh a ṭhiante ruang chu min pe turin vawi tam tak sorkar ka ngen tawh. Tun thlengin kan la nghak reng,” tiin Sadar Hills Autonomous District Council-a Saikul relief camp-a awm mek chuan a fanu ruang chungchang a sawi.

Kar liam ta Ningani tlai khan IGP pathum chuan media mite hnenah ruang ngaihven loh zinga pakuate chu tunge an nih hriat an la nih loh thu an sawi. Hei hi thla li chhunga thuneitu lamin tualchhung buaina chhuaka nunna chan, hliam tuar leh chin hriat lohte chungchang an sawi chhuah vawi khatna a ni.

Ruang ngaihven loh hi Imphal-a Regional Institute of Medical Science -ah 28 leh, Jawaharlal Nehru Institue of Medical Sciences-ah 26 an awm a, Churachandpur District Hospital-ah 42 an awm bawk.

Police report-in a tarlan danin, tualchhung buaina chhuakah hian mi 1,108-in hliam an tuar tawh a, mi 32 chu chin hriat lohin an awm mek. Hmun 5,172-ah in halsak report awmin, in 4,786 chu halral vek an ni. Thil tichhetute hian biak-in 254 leh temple 132 an tichhe tel a ni.