Tripura-in Delhi-ah state Bhavan pathumna tur sak tum

Tripura chief minister Dr Manik Saha chuan Delhi-a Tripura Bhavan sak belhna tur ram dilin kar liam ta Zirtawpni khan Delhi Lieutenant Governor a hmu. Delhi-ah hian Tripura Bhavan pahnih a awm mek a, state sorkar chuan a pathumna tur sak leh a tum a ni.

Dr Saha chuan tuna Chanakyapuri-a Tripura Bhavan awm sa pahnih hian an state mi ṭhahnem tak, chhan hrang hrang avanga Delhi-a awm leh zinte mamawh a phuhru zo lo tih sawiin, sorkar chuan Dwarka area-a Bhavan thar sa leh turin thuthlukna a siam tih a sawi.

“Lieutenant Governor Delhi nen ram leh hemi chungchangah thil dang sawiin thui takin kan inkawm a, kan mamawh thlente pawh ṭha takin min lo dawngsawng. Delhi-ah hian Tripura Bhavan thar kan sak theih thuai kan beisei,” tiin Dr Saha chuan a sawi. Tun hnaiah an state mi leh sa,Delhi-a kal mi tam tak chu room indaih lohna a nasat avangin thlenna mumal nei loin an awm ṭhin, a ti bawk.

Tripura sorkar hian damlote tan, Mumbai leh Chennai-ah Tripura Bhavan sak tumin hma an la mek bawk. Delhi bakah hian Tripura hian Kolkatta-ah Bhavan pali leh Guwahati-ah Bhavan pakhat an nei a ni.