Meghalaya-ah fruit wine industry tihchangtlun a ni dawn : CM ConradSangma

Meghalaya chief minister Conrad K Sangma chuan kar liam ta Ningani khan a kaihhruai sorkar chuan state chhungah fruit wine industry tilar turin ruahmanna a siam tih a sawi. Sangma chuan tualchhung fruitwine siam chhuah hmang hian tourism, agriculture,entrepreneurship leh hna thar siamna tur policy ṭha tak duan a nih tawh thu a sawi.

Shillong-a East Wine Incubation Centre a hawnnaah thu sawiin, Chief Minister chuan ho lam taka lakhuihthei wine tualchhunga siam ṭhin aṭangin changtlung taka wine siam chhuah duhna hi a lo piang chhuak a ni, a ti. “A bur kha nalh lo hle mah se, a chhunga wine erawh a tui hle. Heta ṭang hian, Meghalaya-ah hian fruit wine industry hi nasa takin a ṭhang thei a ni tih kan zir chhuak,” tiin Chief Minister chuan a sawi.“Kan thil tihtum hi tourism, agriculture leh hna thar siam nen a inzawm vek. Hmasawnna nasa tak a thlen thei a ni,” a ti bawk.

Fruit wine industry tihhmasawn dan tur chungchang sawiin Sangma chuan, kalphung mumal, policy ṭha leh tualchhung wine siamtute thlawp a pawimawh thu a sawi. An thil tihtum chu wine industry tan chauh ni lo, state chhunga loneitute, zin mite leh entrepreneur-te tan pawh a nih thu a sawi. "Tuna kan thil tihtur hian state mipuiteah nasa takin a ṭha zawngin danglamna a thlen dawn a ni,” a ti.

Sangma chuan Meghalaya chu fruit wine capital-a siam a tum thu sawiin, mipuite puihna nen chuan a thil tum hi tihhlawhtlin ngei theih a beisei thu a sawi a ni.