Manipur-in tanpuina Rs vbch 20 a dil

Tunhnaia lirnghing na tak tuartu, Manipur chuan lirnghing tuarte chhawmdawlna pekna atan sorkar laipui hnenah
ṭan-puina cheng vaibelchhe 20 pe turin a ngen. Manipur Chief Secretary O Nabakishore chuan Nilaini-a Imphal-a chanchin thar lakhawmtute a kawmnaah he thu hi a sawi a ni.

Thawhṭanni zing khan Manipur-ah hian magnitude 6.7-a nain lir a nghing, lirnghing vanga chhiatna thlengah mi pariat an thi a, mi dang 96 in hliam an tuar. Chenna in leh office building 371 a chhe bawk niin State Relief and Disaster Management department report chuan a tarlang.

Chief Secretary chuan sorkar laipui chuan chhawm-dawl hna thawhna atan state sorkar hnenah cheng vaibel-chhe hnih a pe chhuak phawt niin a sawi bawk.

Nabakishore chuan state sorkar chuan thi chhungte hnenah ralna, cheng nuai 5 ṭheuh a pek dawn bakah, hill area-a lirnghingin chenna in a sawichhiat sakte hnenah zagnadawmna cheng nuai khat ṭheuh, valley area-a chengte hnenah Rs 95,000 ṭheuh a pe dawn tih a sawi.

Hetihlai hian district hrang hranga lirnghing chhiatna a thlen dan kimchang report chu an la dawng kim lo niin a sawi bawk. District thuneituten report an thehluh kim hunah thil a tihchhiat dante an hre chiang thei chauh dawn a ni, a ti.

Chief Secretary chuan lirnghing tuarte chhawmdawl hna thawk tura National Disaster Response Forece (NDRF) team pahnih tirh luhtte chu Tamenglong district-ah Noney leh Nungba khuaah dah an ni thu a sawi. Vawiin hian NDRF official pali-te chuan thil awmdan enfiah turin Manipur hi an tlawh bawk ang.

Thawhlehni zan khan Industrial Training institute (ITI) team, member pathum awmna chuan Imphal an thleng a, lirnghingin building a tihchhiatte an enfiah dawn. Nilaini khan Imphal-a New Market leh Laxmi Market chhiat dante an enfiah nghal a, January 11 thleng an awm dawn a ni. Anni hian lirnghingin building a sawichhiatte enin,
ṭhiat tur nge thuam ṭhat tur tihte an enfiah dawn a ni.

Health Ministry team pawh Imphal-ah hian kalin, lirnghing vanga hliam tuar, damdawi-ina enkawl mekte dinhmun an enfiah bawk.

Manipur Chief Minister O Ibobi Singh chuan lirnghingin an state chhunga project thawh lai hrang hrangte a nghawng dan enfiahin a fangkual. CM hian Mantripukhri-a IT Park, Kheba Ching-a Mega Tourist project leh Thoubal Khunou-a 400 KV Mega Project thawh mekte a endik. CM hi Power Department, Manipur State Power Distribution Company Ltd. leh Manipur Development Society official-ten an
ṭawiawm.

State sorkarin lirnghing tuarte chhawmdawlna kawng khat atan Thoubal-ah free health camp buatsaih a ni, National Mobile Unit volun-teer-ten an pui bawk. Free health camp-ah hian mi tam tak hnenah a thlawnin damdawi an sem.

Voluntary Health Unit Committee (VHUC) pawhin Regional Institute of Medical Sciences (RIMS), Imphal-a lir-nghing vanga hliam tuar enkawl mekte ṭanpui hna an thawk.

People for Animal, Manipur (PFA) chuan lirnghing tuarte thingtlang khaw eng maw zatah ei tur an sem bawk.