SAG thlengtu tur Meghalaya a lungawi lo

February 5-16 chhunga South Asian Games vawi 12-na chu Assam leh Meghalaya-in an inthlen ṭawm dawn a, mahse Games neih tur inbuatsaih danah Meghalaya a lungawi lo a, a thlengtu a nihna aṭanga inhnuhdawhah a vau.

The Times of India-in a tarlan danin, Mukul Sangma kaihhruai Meghalaya sorkar chuan sorkar laipuiin SAG-a bandminton intihsiakna, Shillong-a neih tur chu Guwahati-ah sawn a tum avangin a lungawi lo hle niin a sawi. Hei vang hian Games an thlen tur pawh hi ngaihtuah ṭhat leh a tum nia tarlan a ni.

Meghalaya State Olympic Associa-tion working president, John F Kharshiing chuan Sport Authority of India director-general Injeti Srinivas, SAG CEO leh IOA president N Ramachandra, IOA Secretary genral Ranjeev Mehta-te hnenah email thawnin, an lungawi loh thu hi a thlen bawk. Mehta chuan, "Senior official-ten a chhan engmah sawi loin, bandminton intihsiak neihna hmun chu sawn a nih thu min rawn hrilh a ni. Hei vang hian state sorkar pawh a lungawi lo hle" a ti. State sorkar chuan thutlukna siam turin high level meeting a ko thuai dawn niin a sawi bawk.

South Asian Games neih turah hian Meghalaya hi inelna chi riat - badminton, table tennis, boxing, archery, judo, taekwondo, wushu leh hmeichhe football thleng tura tih a ni a, Assam hian inelna chi 15 a thleng thung ang. Mahse badminton inelna hi Guwahati-a sawn a nih chuan Meghalaya hian chi sarih chauh a chang dawn ta a ni.

Meghalaya State Badminton Association (MSBA), W Kharshiing pawhin badminton inelna Shillong-a neih tur sawn a ni chu sawiselin, he thilah hiaqn Assam minister hlui leh Assam Badminton Association president Himanta Biswa Sarma leh Assam Official ṭhenkhatte chu inrawlhah a puh.