Tea tribe-te tan study centre hawng dawn

Assam Chief Minister Tarun Gogoi chuan compe­titive exam hrang hranga inbuatsaihna atan tea tribe te tan Guwahati-ah study centre hawn a nih tur thu Assam Tea Tribes Students’ Association (ATTSA) hruaitute hmaah a sawi.

ATTSA hruaitute hian kar kal ta Zirtawpni tlai khan an president Prahlad Gowala hoin Chief Minister Gogoi hi Khanapara-a a chenna-inah an hmu a, darkar khat dawn an inkhawm chhungin thingpui huana hna thawkte hamṭhatna atana an thil beiseite an sawiho.

Tea tribe zinga zirlaite hmasawn nan study centre hawn a rawt bakah Gogoi chuan subdivision leh district headquarters din a rawt bawk a, thingpui huana hnathawkte hriselna lam tihchangtlun nan sorkarin hma a lak tur thu a sawi bawk.

Thingpui huana hnathawkte chenna-in tinah electric metre vuah a nih tur thu a sawi bakah Plantation Labour Act kalpui ṭha lo thingpui huan neitute chungah khauh taka action lak a nih tur thu a sawi.

"Deputy Commissioner (DC) te chu Plantation Labour Act kalpui dan enpui tura hriattir an ni a, dan zawm
ṭha lote chungah action la tura hriattir an ni bawk," a ti.

Meeting-ah hian Chief Minister chuan ATTSA thil phut hrang hrangte chu lo bawhzuisak a tiam nghal.