Sorkar laipuiin funding pattern a tikhirh: Hussain

Assam Rural Development Minister Rakibul Hussain chuan sorkar laipui chu thu dik lo hmanga mipuite hruai kawi tumah puhin sorkar laipuiin project ṭhenkhata sum a pek chhuah dan a tihdanglam chuan funding pattern pumpui a tikhirh vek a ni, a ti.

Financial year, 2015-16 atana Union Ministry of Panchayati Raj-in Assam tana sum a ruahman, cheng vaibelchhe 584.8 aṭangin cheng vaibelchhe 292 chauh a pekchhuah thu sawiin, sum hmanchhuah dan turah state sorkar tan thudelh-kilh a siamsak thu a sawi.

State Institute of Rural Development (SIRD)-in planning manual a buatsaih chu sorkar laipuiin a pawm thu Hussain chuan a sawi bawk a, hemi hnuaiah hian SIRD chuan mi 13,000 hnenah training a pek thu a sawi.

Sorkar laipui chu Assam tihhmasawn tum loah puhin Hussain chuan Assam sum hmuh ṭhinte chu ṭul loa tihtlemsak leh fund pek dan tihkhirhsakah a puh bawk.

"Sorkar laipui chuan state hmasawnna chu a tiṭhuanawp a ni. Financial year kal ta khan

Andhra Pradesh chuan cheng vaibelchhe 934.34 a hmuh bakah Bihar-in vaibelchhe 2,269.18 a hmu a, Gujarat-in vaibelchhe 932.35 leh Karnataka-in vaibelchhe 1,002.85 a hmu bawk, mahse Assam chu vaibelchhe 1,368.46 pek tiam a nih laiin cheng vaibelchhe 584.8 chauh kan dawng a ni," a ti.

Assam Minister Hussain chuan utilization certificate (UC) an thehluh hnuah pawh MGNREGS fund chu tihtawpsak lailawk an ni tih a sawi a, Indira Awas Yojana (IAY) kaltlanga miretheite chenna-in sak tur pawh 60,000-a tihtlem a ni, a ti.

UPA sorkar lai khan Union Ministry of Panchayat chuan Assam-ah hna thar 6,000 lak a lo tiam tawh thu a sawi bawk a, mahse tuna sorkar, NDA sorkar chuan hemi atan hian fund a pek duh loh thu a sawi.

Union Minister for State for Panchayati Raj, Nihal Chand chuan kar kal ta Zirtawpni khan Assam sorkar chu nikum August thlaa pekchhuah tawh central fund cheng vaibelchhe 292 hmang hman loah a lo puh tawh a ni.