NCHAC-a BJP member 10-in Congress an zawm

North Cachar Hills (Dima Hasao) Auto­nomous Council (NCHAC)-a BJP member 10 chuan kar kal ta Inrinni khan Congress an zawm a, Guwahati-a Assam Pradesh Congress Committee (APCC) headquarters, Rajiv Bhawan-ah lawmluhna inkhawm neih nghal a ni.

BJP aṭanga Congress party zawmtute hi- Mihir Garlosa, Athong Lien­thang, Fleming Rupsy Shylla, L Hlima Keivom, Hailamkambe Kuame, Suanthangjen Hrangkhol, Paudaming Nriame, Laljoshua Baite, Khawvelthang Hmar leh Denis Teron te an ni.

Autonomous Council member 18 te chuan a hmain Congress chhuah­sanin BJP an zawm a, Niranjan Hojai chu Chief Executive Member (CEM)-a thlangin BJP sorkar an siam a, heng zinga member 10 chuan tunah Congress zawm lehin NCHAC-ah sorkar an siam leh dawn a ni. Congress member te hian Kulendra Daulagupu chu CEM atan an thlang tawh a, member pathum an neih belh chuan sorkar siam tura member an mamawh zat an nei thei dawn a ni.

Party-a lawmluhna inkhawmah hian APCC vice-president Abdul Hamid, general secretary Diganta Choudhury, secretary Nrimalendu Lang­thasa leh Dima Hasao District Congress Committee president Mah­endra Kemprai te an tel.

Hetihlai hian Dima Hasao biala BJP president hlui, Hamjanan Langthasa chuan NCHAC-a BJP sorkar a pian ṭuma state BJP-in a hmingṭhatna a lak avangin BJP sorkar tlak chhanah pawh a mawh a phur tur a ni, a ti.

NCHAC member Lang­thasa chuan NCHAC huam chhunga BJP president chu thlak
ṭul a tih thu a sawi bawk a, state BJP hruaitute chuan Dima Hasao politics an hriatchian loh thu a sawi bakah an politics chu a danglam bik a ni, a ti.