Garo Hills-a bomb pukah mi 9 an hliam

East Garo Hills khawpui, Williamnagar-a tualchher bomb puakah kar kal ta Inrinni khan mi pakuain hliam an tuar a, hliam tuar zinga mi pathum dinhmun a ṭha lo hle.

Bomb hi chaw hnu dar khat vel khan Williamnagar bazar-a zu dawrah a puak a, mipui pun tan lai takin tihpuah a ni. Police te chuan Garo National Liberation Army (GNLA) helte chu a mawhphurtuah an puh.

Meghalaya Inspector General of Police (IGP), GHP Raju chuan GNLA area commander Ajan Ch Momin (Jimmy)-a'n bomb hi zu dawrah a kam a ni, a ti.

"Hliam tuar pakua zinga mi pathum dinhmun chu a
ṭhat loh thu doctor te'n an sawi a. Hliam tuar zingah hian hmeichhe pakhat a tel a ni. Williamnagar Civil Hospital-a enkawl an nih hnuah Tura lam panpui an ni," tiin IGP Raju chuan a sawi.

Bomb puah hnuah police te chuan bazar chu khartirin, bomb dang a awm leh awm loh an dap nghal.

GNLA helte thiltih chu Raju chuan a dem thu leh dawihzepthlak a tih thu a sawi bawk a, an member tam takin helpawl an bansan tawh avangin GNLA te thiltih chu mi beidawng thiltih a ni, a ti.

Hetihlai hian state sorkar chuan helte thilhtih chu a dem thu a tarlang a, an thiltih chu an hel chhana an chian loh zia tilangtu a ni, a tih bakah mipuite tana pawl ding an nih loh zia tichiangtu a ni, a ti.

State sorkar chuan dan leh thupek lekkawh kawngah mipuite chu sorkar ṭawiawm tura a ngen bakah helte laka beihpui thlaknaah sorkar thawh­pui turin a ngen nghal.