Sum chingpenah Tripura sorkarin mawhphurhna la lo

Tripura Finance Minis­ter, Bhanu Lal Saha chuan mi nuai 14 chuangin chit fund company hrang hranga peipun tuma sum an dah chingpen te te hmuh­let dan turah state sorkar­in a mawh a phur loh thu a sawi.

Congress MLA, Jiten­dra Sarkar-a'n chit fund chingpen chungchanga resolution a putluh sawi­honaah Saha chuan he thu hi Assembly inkhawmah a sawi.

MLA Jitendra chuan sum chingpen chung­changah hian state sorkar chu inrawlha, pawisa dahtute'n an pawisa an hmuhlet leh theihna atana hma la turin a phut a ni.

Hetihlai hian rorellai, CPI (M) MLA, Samir Deb Sarkar chuan chit fund chingpen an buaipui danah kalphung thlak a rawt a, sum chingpen chungchang chu sorkar laipui leh enforcement directorate hnenah thlen a duh thu a sawi.

Eptute chuan state sorkar chu chit fund chingpenah a inthiar­fihlim thei lo tih sawiin, sum chingpen hmuhlet a nih theih nan Chief Minister Manik Sarkar chuan theihtawp chhuah tura sum dahtute a lo tiam tawh tih eptu MLA Ratan Lal Nath chuan a sawi.

Eptu hruaitu, Sudip Roy Barman chuan chit fund chingpenah rorellai, CPI (M) MLA te an inhnamhnawih avangin state sorkar chu inhnamhnawih duh loah a puh.