Manipur Deputy CM-in lirghing tuarte tanpui a tiam

Manipur Deputy Chief Minister, Gaikhangam chuan kar kal ta Inrinni khan January 4-a Manipur lirnghing inṭanna hmun, Tamenglong district tlawhin lirnging tuarte hnenah ṭan­puina bungrua a hlan a, ṭanpui ngaite chu sorkarin theihtawp chhuaha ṭan­pui a tum thu a sawi.

Tamenglong district-ah hian lirnghing tuar, mi 300 vel chu relief camp-ah an la awm.

State sorkarin January 4-a lir­nghing tuarte a ṭanpuina hmasa ber atan Gaikhangam chuan chhawmdawl nan cheng nuai thum a pek bakah blanket leh eiturte a pe a ni.

"Lirnghing tuarte chhawmdawl leh ṭanpui hna chu state sorkarin theihtawp chhuahin a thawk zel dawn a, state sorkar thiltih theih piah lamah a ṭul chuan sorkar laipui pawh kan pun zel ang. Chhawmdawl hna thawh kawngah harsatna a awm lo a ni," a ti.

Gaikhangam chuan lirnghing avanga thi chhungte chu an chenna-inah a tlawh bawk a, District Deputy Commissioner (DC) M Luikham leh official dangte'n an ṭawiawm.

Delhi University-a mithiam, geolo­gist team chuan Tamenglong district hi an tlawh tawh a, an zirchianna behchhanin, Gaikhangam chuan an tui ei laite tihbawlhhlawh thei thilthleng a awm loh thu a sawi.

Hetihlai hian BJP national secretary (Northeast in-charge), Prahlad Singh Patel kaihhruaina hnuaiah BJP team chuan lirnghing natna hmun, Noney leh a chhevel tlawhin lirnghing tuarte an kawm a, state sorkar chu chhawmdawl ngaite chhawmdawl ṭha loah a puh.