Gogoi-a'n AIUDF a tlawn: Sonowal

Union Minister for Sports and Youth leh Assam BJP president ni mek, Sarbananda Sonowal chuan Chief Minister Tarun Gogoi chu sawiselin, politics-a a dinhmun hum nan All India United Democratic Front (AIUDF) tlawn lungawi tumah a puh.

"Congress party chuan BJP a hlau tawh hle a, Chief Minister Gogoi chuan AIUDF party hotu, Badruddin Ajmal chu a hriat loh thu a lo sawi tawh a ni. Mahse tunah chuan Gogoi hian a dinhmun tihngheh nan AIUDF hi lamṭanga siam tumin a tlawn mek a ni," a ti.

Congress party tihlarna atan Chief Minister Gogoi chu hunbi neia press conference ko ṭhinah Sonowal chuan a puh bawk a, Congress party-in mipui rilruah hmun a chan tawh loh thu leh Congress party hming chu kawngpui sira thuziak tar ṭhinah chauh a lan tawh thu a sawi.

"Assam mipuite hmasawnna tur lam kan ngaihtuah avangin press conference koh nan hun kan nei tam lo a ni," tiin a sawi bawk.

Assam-a kum 15 sorkar tawh Congress sorkar paihthlak nan Sonowal chuan party office-bearer leh worker te chu theihtawp chhuaha thawk turin a ngen nghal a, rorelna dik leh eiruk awm lohna sorkar din chu an thil tum lian ber a ni, a ti.

Kum nga chhungin Assam-a district tinah rel luh tir a tiam bakah Kuruwa, Sipajhar leh Guwahati inkalpawhnaa Brah-maputra lui chungah lei dawh vek a tiam bawk.

Hetihlai hian Assam Pradesh Congress Committee (APCC) chuan AIUDF chu BJP 'B team' tiin a sawisel thung.

BJP-in AIUDF lamṭanga siam tum tia a puhna chu APCC chuan chhanglet nghalin, AIUDF chu ṭanrualpui an tum loh thu a tarlang.

"Kumin state Assembly inthlan neih turah AIUDF hi thawhpui tumin kan sawm lo a, anmahni lamin thawkho turin min rawn sawm zawk a ni," tiin APCC general secretary Imdad Hussain chuan a sawi.

Congress party chuan BJP chu state Assembly inthlana a ruka AIUDF nena thawhho tumah a puh let.

"Kum 2014 Lok Sabha inthlan khan AIUDF chu BJP tan a lo thawk tawh a, AIUDF chuan hnam tlem zawkte vote tihdarh nan candidate a siam mai chauh a ni. Assembly inthlan neih turah pawh hian hetianga an tih leh a rinawm a ni," tiin Hussain chuan a sawi.

AIUDF hotu, Badruddin Ajmal chu sawisel zuiin, a kaihhruaina hnuaih AIUDF chuan mipui thlawpna a hloh tawh a ni, a ti a, Assembly inthlan result hmanga zirtirna pek an tum thu a sawi.

"BJP-in kum 2016 state Assembly inthlana hnehna chan an tum leh, Deputy Chief Minister-a Badruddin Ajmal dah an tum chu a takin a thleng ngai lo ang," tiin a sawi bawk.