NSCN (K) helte nen kan thawkho lo: Tuki

Tirap, Changlang leh Longding (TCL) biala MLA te'n an puhna chu chhangletin Arunachal Pradesh Chief Minister Nabam Tuki chuan NSCN (K) helte nen an thawhho loh thu a sawi.

TCL biala MLA pathum- Thangwang Wangham, Honchun Ngandam leh Gabriel D Wangsu chuan Chief Minister Tuki chu anmahni khapna atana NSCN (K) helte hmangah an puh a ni.

MLA pathumin an puhna chu Tuki chuan mi beidawngte thiltih tiin a sawi a, thu belhchian dawl lo a ni tih a sawi bakah amah tihhmingchhiat an tumna mai a ni, a ti.

Tuki chuan eng helpawl mah a thawhpui loh thu sawiin, Arunachal-a district buai ber pathum- Tirap, Changlang leh Longding district-a remna leh muanna a awm theih nan state sorkarin theihtawp a chhuah thu a sawi.

Chief Minister Tuki chuan Department of Tirap, Changlang and Longding (DoTCL) tana fund an ruahman pawh an tihpun thu a sawi bawk a, ṭhalai hna nei lote leh district hmasawnna nan project ṭhahnem tak an thawk mek a ni, a ti.

District pathum huam chhung aṭanga Autonomous District Council siam tumin sorkar laipuiah theihtawp chhuahin a nawr mek tih a sawi bawk.

"Dawta midang puh hmingchhiat tum loin MLA pathumte hian state hmasawnna hna lo thawk zawk rawh se. Tirap, Changlang leh Longding district mipuite chuan an hmasawnna tur ngaituahsaktu tur, hruaitu an mamawh a ni," a ti.

MLA pathumte'n an puh hmingchhiat avangin Tuki chuan an lakah thubuai a thehlut tih a sawi bawk a, legal notice pawh pek tawh an ni, a ti.