Central leh state sorkar lakah lirnghing tuarte lungawi lo

January 4-a Manipur-a lirnghing tuarte chuan sorkar laipui leh state sorkar laka an lungawi loh thu an tarlang.

Lirnghing tuarte hian thlasik boruak vawt tak kara chenna-in nei loa an awm laiin sorkar laipui leh state sorkar chu anmahni chhawmdawl
ṭha loah an puh.

Richter scale 6.7-a naa lirnghing-ah khan mi pakua an thi a, mi 110-in hliam an tuar a ni. In chim avangin mi ṭhahnem tak chenna-in nei loin an awm mek a, sorkar chhawmdawlna kalpui danin mipui beisei a pha lo hle.

"January 4 khan lir a nghing tawh a, January 9 tlai chauh khan Governor V. Shammuganathan chuan hmeichhe bazar chimna hmun a tlawh a ni. Bazar hi a chenna-in aṭanga metre 50 chauha hla a ni," tiin Imphal-a dawrkai pakhat chuan a sawi.

Manipur Chief Minister Okram Ibobi leh minister te pawhin lirnghing natna hmun leh a tuarte hi an la tlawh lo a, Deputy Chief Minister Gaikhangam chauhin kar kal ta Inrinni khan lirnghing inṭanna hmun, Tamenglong district a tlawh a ni.

Hetihlai hian Mani-pur Chief Secretary, Oinam Nabakishore chuan lirnghing tuarte chhawmdawlna atan state sorkarin cheng vaibelchhe hnih a pekchhuah tawh thu sawiin, district tinah cheng nuai 50 ṭheuha sem a nih tur thu a sawi.

Lirnghing tuarte hian sorkar aṭangin cheng khat mah ṭanpuina an la dawn loh thu an tarlang a, mi
ṭhenkhat chuan state sorkar official te'n ṭanpuina sum chu an lo ei zawhsak an hlauhthawn thu an sawi.

State sorkar chuan lirnghing tuarte chhawm-dawl leh ṭanpuina atan sorkar laipuiah cheng vaibelchhe 20 a dil a, union minister leh BJP party hruaitute'n ṭanpui tiam mah se chhungkaw tam tak chuan engmah an la dawng lo a ni.